CMS Nədir?

Məzmun idarəetmə sistemi (CMS – Content Management System) şirkətlərin rəqəmsal məzmunlarını asanlıqla idarə etməsinə kömək edir. Bütün komandalar bu sistemi istifadə edərək məzmun yarada, redaktə edə, təşkil edə və yayımlaya bilərlər. CMS məzmunun saxlanması üçün vahid bir yer kimi fəaliyyət göstərir və iş proseslərini avtomatlaşdıraraq komandaların birgə işləməsini təmin edir. Sistemdə hər kəsin rolu fərqlidir. Məsələn, yazarlar məzmunu yaza və yadda saxlaya bilər, amma onu redaktə edib yayımlamaq redaktorların işidir. İnzibatçılar isə həm məzmunu yarada, həm də başqalarına redaktə və yayımlama icazəsi verə bilərlər. Bu sistem işləri daha nizamlı və sürətli aparmağa kömək edir.

CMS veb saytların və veb sayt məzmunlarının minimum texniki iş yükü ilə yaradılmasına və idarə olunmasına kömək edir. Beləliklə, layihə və ya trafik meneceri kimi vaxt sərf etmək əvəzinə daha keyfiyyətli məzmun yaratmaq mümkündür. Məzmun idarəetməsi üçün asan və sərfəli bir həll təqdim edən CMS, şirkətlərin tam ştatlı məzmun inkişaf etdirmə komandasına investisiya etmədən məzmunlarını idarə etməsinə və yaymasına imkan verir.

Ən çox istifadə olunan CMS-lər hansılardır?

Məzmun idarəetmə sistemləri (CMS) müxtəlif məqsədlərə və istifadəçi ehtiyaclarına uyğun bir neçə növə ayrılır. Bəzi CMS-lər sadə bloqlar və korporativ saytlar üçün nəzərdə tutulduğu halda, digərləri daha mürəkkəb e-ticarət platformaları üçün istifadə olunur. Hər bir CMS növü fərqli funksionallıq, istifadə rahatlığı və fərdiləşdirmə imkanları təklif edir.

Ən çox istifadə olunan 3 CMS-i sizə təqdim edirik:

WordPress

WordPress dünyada ən çox istifadə olunan CMS sistemlərindən biridir və milyonlarla veb saytı idarə etməyə imkan verir. Açıq mənbə kodlu olması səbəbindən istifadəçilər və developerlər tərəfindən geniş şəkildə fərdiləşdirilə bilər. İstifadəçi dostu interfeysi sayəsində kodlaşdırma bilməyənlər belə asanlıqla veb sayt yarada və idarə edə bilərlər. Minlərlə pulsuz və ödənişli plagin və şablonlar təqdim edərək veb saytların funksionallığını artırmağa imkan verir. Bloqlar, biznes saytları, e-ticarət platformaları və portfoliolar üçün uyğun bir həlli hesab olunur. SEO optimallaşdırması, təhlükəsizlik yeniləmələri və mobil uyğunluq xüsusiyyətləri sayəsində geniş istifadə olunur. WordPress həm fərdi istifadəçilər, həm də böyük şirkətlər üçün ideal CMS seçimlərindən biri ola bilər.

Wix

Wix veb sayt yaratmaq və biznesinizi böyütmək üçün sizə müxtəlif alətlər təqdim edən güclü bir platformadır. Saytlarınızı kod yazmadan və ya kod yazaraq, boş və ya hazır bir sayt şablonunu fərdiləşdirərək və ya süni intellektin köməyi ilə yaratmağa imkan verir. Təklif olunan funksiyalar sayəsində sadə bir şəxsi bloqdan tutmuş, onlayn bizneslər üçün mürəkkəb veb saytlara qədər geniş seçimlərdən yararlana bilərsiniz. E-ticarət, marketinq, planlama, brend yaratma kimi müxtəlif sahələrdə inteqrasiya olunmuş xüsusiyyətlər təqdim olunur. Wix veb sayt sahəsindəki fəaliyyətləri ilə yanaşı, uzun müddətdir ki, veb dizayn sahəsində beynəlxalq miqyasda lider mövqeyə sahibdir.

Tilda

Tilda kod yazmağa ehtiyac olmadan vizual dizayna əsaslanan veb saytlar yaratmağa imkan verən bir CMS sistemidir. İstifadəçilər sürüşdür-burax texnologiyası vasitəsilə müxtəlif blokları birləşdirərək peşəkar saytlar qura bilərlər. Platforma əsasən biznes saytları, portfoliolar, açılış səhifələri və onlayn mağazalar üçün nəzərdə tutulub. Tilda SEO optimallaşdırması, mobil uyğunluq və inteqrasiya imkanları kimi müasir funksiyalar təklif edir. Sistemdə 500-dən çox hazır blok və şablon mövcuddur ki, bu da istifadəçilərə dizayn prosesini sürətləndirməyə kömək edir. Marketinq və analitika alətləri ilə təchiz olunmuş Tilda həm fərdi istifadəçilər, həm də şirkətlər üçün əlverişli həllər təqdim edir. Platformanın sadə interfeysi və geniş imkanları onu yeni başlayanlar üçün ideal seçim edir.

CMS-lərin təsnifatı

Fərqli məzmun idarəetmə sistemləri (CMS) mövcuddur. Şirkətlərin ehtiyaclarına uyğun olaraq hazırlanan bu sistemlər tələblərə əsasən seçilir və tətbiq edilir. CMS-ləri aşağıdakı kimi təsnifləndirmək olar:

·   WCMS (Web Content Management System) – Veb Məzmun İdarəetmə Sistemi,

·   MCMS (Media Content Management System) – Media Məzmun İdarəetmə Sistemi,

·   DMS (Document Management System) – Sənəd İdarəetmə Sistemi

·   ECMS (Enterprise Content Management System) – Korporativ Məzmun İdarəetmə Sistemi,

·   MCMS (Mobile Content Management System) – Mobil Məzmun İdarəetmə Sistemi,

·   CCMS (Component Content Management System) – Komponent Məzmun İdarəetmə Sistemi.

ECMS şirkətlər tərəfindən istifadə edilən məzmun idarəetmə sistemidir. İşçi məlumatları, şirkət qeydləri kimi bütün daxili məlumatları idarə edən bir sistemdir. WCMS sadə interfeysə malik olan veb məzmun idarəetmə sistemidir və veb saytlar üçün məzmunun idarə olunmasını təmin edir. DMS sənədlər, şəkillər və arxiv materiallarının idarə olunmasına nəzarət edən bir məzmun idarəetmə sistemidir.

MCMS mobil cihazlar və smartfonlar üçün hazırlanmış bir məzmun idarəetmə sistemidir. Bu sistem, məzmuna mobil telefonlardan giriş imkanı yaradır. CCMS komponentlərə əsaslanan məzmun idarəetmə sistemidir və müəyyən elementlər (şəkillər, paraqraflar, ifadələr) şəklində məzmunun idarə olunmasını təmin edir.

CMS sistemlərinin xüsusiyyətləri nələrdir və hansı faydaları var?

CMS sistemləri veb sayt idarəetməsini asanlaşdıraraq, şirkətlərə və fərdi istifadəçilərə effektiv məzmun idarəetmə imkanı yaradır. İstifadə rahatlığı, SEO optimallaşdırması, təhlükəsizlik və uyğun maliyyətli olması səbəbindən CMS-lər müasir rəqəmsal dünyada geniş istifadə olunur. Texniki bilik tələb etmədən peşəkar məzmun yaratmaq və yayımlamaq istəyənlər üçün CMS ideal bir həll təqdim edir.

CMS-in əsas xüsusiyyətləri hansılardır?

Məzmun idarəetmə sistemi (CMS) veb saytların yaradılması və idarə olunmasını asanlaşdıran bir platformadır. CMS sistemlərinin əsas xüsusiyyətləri bunlardır:

·        İstifadəçi dostu interfeys – Kod yazma bilməyən istifadəçilər üçün asan və intuitiv idarəetmə paneli təqdim edir.

·        Məzmun yaradılması və redaktəsi – İstifadəçilər məzmunu yazıb, redaktə edib, istədikləri zaman yayımlaya bilərlər.

·        Şablon və dizayn seçimləri – Hazır dizayn şablonları və ya xüsusi dizayn yaratmaq üçün imkanlar təqdim edir.

·        Fərqli istifadəçi rolları – Administrator, redaktor, yazar kimi fərqli rol və icazələr təyin edilə bilər.

·        SEO dəstəyi – Axtarış sistemləri üçün optimallaşdırma (SEO) alətləri ilə veb saytın görünürlüyünü artırır.

·        Çoxdilli dəstək – Fərqli dillərdə məzmun yaradıb yayımlamağa imkan verir.

·        Mobil uyğunluq – Mobil cihazlar üçün uyğunlaşdırılmış dizayn və idarəetmə imkanı yaradır.

·        İnteqrasiya bacarıqları – Digər platformalar, sosial media və üçüncü tərəf tətbiqləri ilə inteqrasiya oluna bilir.

·        Təhlükəsizlik – Sayt məlumatlarını qorumaq üçün təhlükəsizlik tədbirləri təqdim edir.

CMS-in faydaları hansılardır?

CMS sistemlərinin istifadəsinin bir çox üstünlüyü var:

·        Vaxta və resurslara qənaət – Texniki bilik tələb etmədən məzmunu idarə etmək mümkün olduğu üçün iş prosesi daha sürətli və səmərəli olur.

·        Asan idarəetmə – İstifadəçilər veb sayt məzmununu mərkəzi bir paneldən rahat şəkildə idarə edə bilərlər.

·        Daha az texniki bilik tələbi – Kodlaşdırma bilməyən şəxslər belə rahatlıqla veb sayt yarada və idarə edə bilərlər.

·        Davamlı yenilənmə və təhlükəsizlik – CMS platformaları mütəmadi yenilənir və təhlükəsizlik tədbirləri gücləndirilir.

·        Uyğun maliyyətli həll – Peşəkar veb sayt inkişaf etdirməyə ehtiyac olmadan daha az xərclə keyfiyyətli məzmun idarə etmək mümkündür.

·        SEO və marketinq dəstəyi – CMS-lər veb saytın axtarış sistemlərində daha yaxşı mövqedə olmasını təmin edən SEO alətləri ilə təchiz edilir.

·        Uyğunlaşma və miqyaslanma – CMS kiçik bizneslərdən böyük şirkətlərə qədər hər kəsin ehtiyaclarına uyğun genişlənə bilər.

·        Backup alınması və məzmunun geri qaytarılması – Məzmun itkisinin qarşısını almaq üçün avtomatik backup almaq və məlumat bərpaetmə xüsusiyyətləri mövcuddur.