2025-ci İldə Hansı Elektron Kommersiya Trendləri var?

Artıq internetin və həyatımızın bir-biri ilə bağlı olduğu bir dövrdə yaşayırıq və bu bizim gündəlik həyatdakı vərdişlərimizə də təsir edir.  Alış-veriş vərdişlərimiz də internetin bizə təklif etdiyi daimi yeniliklərə görə dəyişə bilir. Günümüzdə qidalardan tutmuş elektron avadanlıqlara qədər hər bir şeyi internetdən almaq mümkündür və bir çoxumuz 7/24 açıq olan bu elektron mağazalardan alış-veriş etməyə artıq öyrəşmişik.  

Elektron dünya hər gün intensiv şəkildə inkişaf edir. Bu internet üzərində qurulmuş müxtəlif sahələrə təsir edir və onların da bu inkişafla ayaqlaşmasını tələb edir. Təbii olaraq bu sahələrdən biri də elektron ticarət və ya digər adı ilə elektron kommersiya sahəsidir. Bəs günbəgün dəyişən bu sahə üçün 2025-ci ildə trendlər necə dəyişəcək? Gəlin bunu bir yerdə öyrənək.

1. Süni İntellekt (AI)

Süni intellekt və maşın öyrənmə texnologiyaları artıq həyatımızın hər sahəsinə təsir edir. ChatGPT, Claude, Midjourney və s. kimi adlar indi hər kəsə tanışdır. Elektron kommersiya sahəsi isə süni intellekti ən sürətlə qəbul edən sahələrdən biridir. Araşdırmalara görə, pərakəndə satışda süni intellektin istifadəsi ildən-ilə artır. Süni intellektin əsas məqsədi müştərilərə daha fərdi xidmət göstərmək və onların brendlərə olan güvənini artırmaqdır. Yəni, əvvəlki kimi hər kəsə eyni reklamlara baxmaq əvəzinə, indi hər müştəri öz zövqünə və maraqlarına uyğun təkliflər alır.

Aşağıda süni intellektin elektron ticarətdə ən vacib tətbiq sahələri göstərilib:

1. İşlərin avtomatlaşdırılması: Şirkətlər süni intellektdən istifadə edərək bir çox gündəlik tapşırıqları avtomatik yerinə yetirir. Məsələn:

• Məhsul təsvirləri və reklam məzmunları süni intellekt vasitəsilə qısa zamanda yazılır.
• Çatbotlar müştərilərə 24/7 cavab verir.
• Ağıllı anbar sistemləri stokları daim izləyir və tükənmə riskini azaldır.

2. Fərdi alış təklifləri: Süni intellekt hər müştərinin zövqünü analiz edərək ona uyğun məhsul təklif edir. Məsələn:

• Geyim satan bir mağaza soyuq bölgələrdə yaşayanlara qar botları, isti ərazilərdə olanlara isə yay geyimləri təklif edir.
• Daha yüksək səviyyəli fərdiləşdirmə isə müştərinin keçmiş alış-veriş vərdişlərini də nəzərə alır.     

3. Əlavə satış imkanları:

• Üst satış (up-selling): Müştəri noutbuk alırsa, sistem ona daha güclü və daha bahalı bir model təklif edə bilər.
• Çarpaz satış (cross-selling): Müştəri noutbuk alırsa, ona uyğun qoruyucu çanta və ya proqram təminatı tövsiyə edilə bilə

4. Gələcək tələbi proqnozlaşdırmaq: Süni intellekt müştəri davranışlarını və bazar trendlərini analiz edərək, şirkətlərə hansı məhsulların daha çox satılacağını əvvəlcədən təxmin etməyə kömək edir. Bu məlumatlar sayəsində:

• Anbarlar daha effektiv idarə olunur.
• Tələbə uyğun məhsul istehsalı planlaşdırılır.
• Reklam kampaniyaları daha dəqiq hədəflənir.

Süni intellektin gücündən düzgün istifadə edildikdə, elektron ticarət şirkətləri həm müştəri məmnuniyyətini artırır, həm də gəlirlərini yüksəldə bilir.

2. Omnichannel satış strategiyaları

Omnikanal satış strategiyaları 2025-ci ildə e-ticarətin əsas trendlərindən biri kimi ön plana çıxır. Müştərilər artıq alış-veriş zamanı fərqli kanallar arasında rahat keçid etmək istəyirlər. Fiziki mağazalar, mobil tətbiqlər, sosial media platformaları və veb saytlar arasında vahid bir təcrübə yaratmaq brendlər üçün vacib hala gəlib. Sosial media üzərindən birbaşa alış-veriş, müştəri xidmətlərinin müxtəlif platformalarla inteqrasiyası və eyni zamanda fərdiləşdirilmiş təkliflər təqdim etmək satışları artırır. Bu strategiya müştəri məmnuniyyətini yüksəltməklə yanaşı, brendlərə daha geniş auditoriyaya çatmaq imkanı yaradır. Big Data və süni intellektdən istifadə edərək, müştəri davranışlarını analiz edib, onlara uyğun fərdiləşdirilmiş təkliflər təqdim etmək mümkündür. Omnikanal yanaşması sayəsində müştərilər istədikləri məhsulu onlayn seçib, mağazada yoxlaya və ya bir platformada başlayan alış-verişlərini digərində tamamlaya bilirlər. Eyni zamanda, bu strategiya brendlərə stok idarəçiliyini optimallaşdırmağa və müştərilərlə daha effektiv əlaqə qurmağa kömək edir. Şəffaf və vahid alış-veriş təcrübəsi təqdim edən şirkətlər bazarda daha güclü mövqe tutur. Gələcəkdə omnikanal strategiyalarının inkişafı ilə e-ticarət daha da rəqəmsallaşacaq və istifadəçi yönümlü həllər daha çox yayılacaq.

3. Sosial Ticarət

Elektron ticarət artıq sosial media ilə sıx bağlıdır və bu da yeni bir sahənin – sosial ticarətin yaranmasına səbəb olub. Bu trend böyük potensiala malikdir və markalar üçün yeni satış imkanları yaradır.

Sosial ticarətin üstünlükləri:

• Sosial media reklamları geniş müştəri auditoriyasına çatmağa kömək edir.
• Sosial media üzərindən birbaşa satış imkanı var ki, bu da alış prosesini sadələşdirir və sürətləndirir.
• Maraq doğuran brend məzmunu müştərilərin diqqətini cəlb edir və onların markaya bağlılığını artırır.
• İnfluencer marketinqi, yəni məhsulların məşhurlar, blogerlər və digər təsir gücünə malik şəxslər tərəfindən tanıdılması satışları artırır.

Instagram, Facebook, TikTok və digər sosial media platformalarında aktiv olmayan markalar, bu inkişaf edən trenddən geri qalmamaq üçün sosial ticarətə investisiya qoymağa təşviq edilir. Çünki müasir dövrdə insanlar alış qərarlarını sosial media üzərindən verir və rahatlıqla sifariş edə bilmək istəyirlər.

4. Mobil Ticarət

Bugün dünyada internet istifadəçilərinin təxminən 96%-i mobil cihazlardan internetə qoşulur. Buna görə də, mobil alış-veriş 2025-ci ilin əsas elektron ticarət trendlərindən biri kimi ön plana çıxır. Mobil internet istifadəçilərinin sayının artmasının əsas səbəbləri ağıllı telefonların geniş yayılması və sabit internet bağlantılarının mövcudluğudur.

Mobil ticarətin sürətlə böyüdüyü açıq-aşkardır. 2024-cü ildə mobil satışlar 2,52 trilyon dollara çataraq, ümumi qlobal e-ticarət satışlarının 60%-ni təşkil edib.

Bu tendensiyanı başa düşən onlayn mağazalar mobil optimizasiyaya üstünlük verir. İki əsas yanaşma var:

• Mobil uyğunlaşan veb dizayn – Saytların mobil versiyaları daha sadə naviqasiya və kiçik ekranlara uyğunlaşdırılmış məhsul məlumatları ilə hazırlanır.
• Mobil tətbiqlər – Daha geniş funksiyalar təklif edərək istifadəçi təcrübəsini yaxşılaşdırmaq üçün xüsusi proqramlar inkişaf etdirilir.

Mobil alış-verişin artması markaları mobil dostu platformalar yaratmağa və müştərilərin rahatlığına fokuslanmağa sövq edir.

5. Fərdiləşdirmə (Şəxsi Təkliflər)

Əvvəllər hər kəsə eyni reklamlar göstərilir və təsadüfi məhsullar təklif olunurdu. İndi isə müştərilər sadəcə brendlərin satmaq istədiyi məhsulları deyil, həqiqətən ehtiyac duyduqları məhsulları görmək istəyirlər. Buna görə də, fərdiləşdirmə (şəxsi təkliflər) elektron ticarətdə ən vacib trendlərdən birinə çevrilib.

Araşdırmalara görə:

• Müştərilərin 91%-i şəxsi təkliflər təqdim edən markalardan alış-veriş etməyə daha çox üstünlük verir.
• 80%-i fərdiləşdirilmiş alış-veriş təcrübəsinin onları eyni mağazadan yenidən alış etməyə həvəsləndirdiyini bildirir.
• Fərdiləşdirmə marketinq xərclərinin effektivliyini artırır, müştəri cəlb etmə xərclərini azaldır və gəlirləri yüksəldir.

Süni intellekt (AI) artıq müştərilərin veb-saytlarda və tətbiqlərdəki hərəkətlərini izləyərək onların maraqlarını anlayır. O əvvəlki sifarişlərə baxaraq müştərilərə uyğun məhsullar tövsiyə edir, istifadəçinin axtarışlarını və baxdığı məhsulları analiz edərək, onun ehtiyaclarını daha yaxşı başa düşür, e-poçt və ya bildirişlər vasitəsilə müştəriyə fərdi endirimlər və təkliflər təqdim edir.

Bu texnologiyalardan istifadə edən markalar müştərilərin etibarını qazanır və satışlarını artırır. Müştəri nə qədər məmnun olarsa, bir o qədər çox geri qayıdar və alış-veriş edər.

6. Davamlı Məhsullar və Tətbiqlər

İnsanlar artıq alış-veriş edərkən təbiətə zərər verməyən məhsullara və ekoloji cəhətdən məsuliyyətli şirkətlərə üstünlük verirlər. Bir çox müştəri ətraf mühiti qorumaq üçün alış-veriş vərdişlərini dəyişməyə hazırdır.

Buna görə də, davamlılıq elektron ticarətdə getdikcə daha vacib bir trendə çevrilir. Şirkətlər bu sahədə müxtəlif addımlar atır:

• Enerji israfının azaldılması – Mağazalar və anbarlar elektrik və su istehlakını minimuma endirməyə çalışır.
• Ekoloji qablaşdırma – Plastik yerinə kağız və ya bioloji olaraq parçalana bilən materiallardan istifadə olunur.
• Lazımsız qablaşdırmadan imtina – Böyük qutular əvəzinə məhsula uyğun ölçüdə qablaşdırmalar seçilir.
• Məhsul qaytarmalarının azaldılması – Müştərilər üçün daha dəqiq məhsul təsvirləri və virtual sınama imkanları yaradılır.
• Ekoloji çatdırılma – Elektrikli nəqliyyat vasitələri və karbon neytral çatdırılma üsulları tətbiq olunur.

Bundan başqa, kirayə xidmətləri və ikinci əl bazarları da geniş yayılmağa başlayıb. Bu tendensiya müştərilərin təkcə yeni məhsul almaq deyil, həm də istifadəyə yararlı ikinci əl məhsullara yönəldiyini göstərir. Şirkətlər bu dəyişikliklərə uyğunlaşaraq həm təbiəti qoruyur, həm də müştərilərin etibarını qazanır.

2025-ci ildə e-kommersiya sektoruna süni intellekt, artırılmış reallıq və sosial ticarət kimi innovativ texnologiyaların təsiri daha güclənəcək. Mobil ticarət alış-verişin əsas formalarından biri kimi yerini möhkəmləndirməyə davam etməsi, brendləri mobil optimizasiya və tətbiq inkişafına yönləndirilməsi davam edəcək. Sürətli çatdırılma və fərqli ödəniş sistemləri isə istifadəçi rahatlığını maksimuma çatdıraraq satışların artırılması proqnozlaşdırılır.  Bu trendləri düzgün tətbiq edən e-ticarət şirkətləri rəqabətdə üstünlük əldə etməsi və bazarda daha güclü mövqeyə sahib olması gözləniləndir.