Event Marketing Nədir?

Event marketing və ya tədbir marketinqi bir markanın məhsul və ya xidmətlərini tanıtmaq, istehlakçılarla birbaşa ünsiyyət qurmaq və brend imicini gücləndirmək məqsədilə müxtəlif tədbirlər təşkil etməsidir. Bu marketinq üsulu markaların müştəriləri ilə emosional bağ qurmasına, brendə olan marağı artırmasına və satışlarını yüksəltməsinə yardım edir. Bu tədbirlər aşağıdakılar ola bilər:

• Yeni məhsul təqdimatları
• Seminar və konfranslar
• Festival və yarmarkalar
• Influencer və tərəfdaş görüşləri
• Korporativ tədbirlər və ya sponsorluqlar

Event marketing həm fiziki, həm də onlayn formatda keçirilə bilər. Onlayn tədbirlər vebinarlar, canlı yayım təqdimatları və ya virtual sərgilər formasında həyata keçirilə bilər. Əsas məqsəd iştirakçılarda müsbət təəssürat yaratmaq, onları fəal şəkildə cəlb etmək və markanı yadda qalan hala gətirməkdir. Qısaca desək, event marketing reklamdan fərqli olaraq interaktiv və təcrübə əsaslı bir yanaşmadır.

Event marketing necə edilir?

Event marketing həyata keçirmək istəyən şəxslər və müəssisələr üçün ilk növbədə diqqət yetirilməli olan məsələ yaxşı bir operativ strukturun qurulmasıdır. Buna görə də markaların bu strukturu qura bilmələri üçün aşağıdakı mərhələlərə xüsusi önəm verməsi vacibdir:

• Büdcə planının hazırlanması
• Tədbirin məqsədinin müəyyənləşdirilməsi
• Qonaqların müəyyənləşdirilməsi
• Tədbirin zamanının və yerinin müəyyən edilməsi
• Tədbirin tanıdılması
• Tədbirin həyatakeçirilməsi

İndi isə gəlin bu mövzulara birlikdə daha ətraflı şəkildə baxaq.

Büdcə planının hazırlanması

Event marketing strategiyası hazırlayarkən ilk diqqət yetirilməli olan məsələlərin başında büdcə planlaşdırılması gəlir. Çünki tədbirin uğurla həyata keçirilməsi üçün məkanın icarəsi, texniki avadanlıqlar, qonaq qarşılaması, logistik ehtiyaclar və digər prosesləri həyata keçirmək üçün maddi vəsait tələb olunur. Bundan əlavə, event marketing zamanı reklam və tanıtım işləri üçün də əlavə xərclər nəzərdə tutulmalıdır. Təşkil edəcəyiniz event marketing tədbiri üçün əvvəlcədən büdcə planı hazırlamaq xərclərin nəzarət altında saxlanmasını təmin edir və markanızın maliyyə imkanlarını effektiv idarə etməyə imkan yaradır. Buna görə də əgər markanızı böyütmək və ya satışlarınızı artırmaq istəyirsinizsə, event marketing fəaliyyətlərinə başlamazdan öncə mütləq şəkildə büdcə planı üzərində işləməyə xüsusi diqqət yetirməlisiniz.

Tədbirin məqsədinin müəyyənləşdirilməsi

Markalar tərəfindən təşkil olunan hər bir event marketing fəaliyyəti müəyyən bir məqsədə xidmət edir. Bəzi markalar iş tərəfdaşları ilə daha sıx əlaqələr qurmaq üçün tədbirlər təşkil edərkən, digərləri məhsul və xidmətlərini daha geniş auditoriyaya tanıtmaq istəyirlər. Bu mərhələdə markaların təşkilat prosesləri fərqli ola bilər. Buna görə də hər bir marka event marketing fəaliyyətinə başlamazdan əvvəl keçirəcəyi tədbirin məqsədini dəqiq müəyyənləşdirməlidir. Bu şəkildə, tədbirin məqsədinə uyğun addımlar atmaq mümkün olar və markanın hədəflərinə çatması daha effektiv şəkildə təmin edilə bilər.

Qonaqların müəyyənləşdirilməsi

Markalar tərəfindən həyata keçirilən event marketing strategiyasında dəvət olunacaq şəxslər tədbirin məqsədindən asılı olaraq dəyişə bilər. Adətən iş tərəfdaşları ilə görüşmək və münasibətləri gücləndirmək məqsədi ilə təşkil olunan tədbirlərdə dəvətlilər distribyutorlar və digər biznes tərəfdaşları olur. Məhsul və xidmət tanıtımına yönəlmiş tədbirlərdə isə influencerlərin dəvət olunması daha məqsədəuyğundur. Əgər tədbir marka tanınırlığını artırmaq məqsədi ilə keçirilirsə, bu halda mətbuat nümayəndələrinin dəvət olunması xüsusi əhəmiyyət daşıyır. Buna görə də markalar ilk olaraq tədbirin məqsədini müəyyənləşdirməli, daha sonra isə uyğun dəvətlilər siyahısı hazırlayaraq onları tədbirə dəvət etməlidirlər.

Tədbirin zamanının və yerinin müəyyən edilməsi

Event marketing çərçivəsində tədbirə qatılacaq şəxsləri müəyyən etdikdən sonra atılmalı olan növbəti addım tədbirin məkanı və vaxtının düzgün seçilməsi ilə bağlı işləri planlaşdırmaqdır. Bu mərhələdə hər bir markanın diqqət yetirməli olduğu bir sıra vacib məqamlar mövcuddur. Əvvəlcə nəzərə alınmalı məqam tədbirin keçiriləcəyi məkanın əlçatan və mərkəzə yaxın olmasıdır. Asanlıqla tapılan, nəqliyyatla rahat gedilə bilən yerlər daha çox iştirakçının gəlməsinə şərait yaradır. Əks halda, çətin yerləşən və uzaq məkanlarda təşkil olunan tədbirlər gözlənilən effekti verməyə bilər. Zaman seçimi də bir o qədər önəmlidir. Tədbirin iş günlərinin əvvəlinə, yəni bazar ertəsi və çərşənbə axşamına salınması insanların məşğulluğu səbəbilə iştirak səviyyəsini azalda bilər. Bu baxımdan, şənbə və bazar kimi həftəsonları insanların daha çox vaxt ayıra biləcəyi dövrlər kimi ön plana çıxır. Beləliklə, həm rahatlıq, həm də maksimum iştirak üçün düzgün məkan və vaxt seçimi vacib strateji addımdır.

Tədbirin tanıdılması

Event marketing üçün bütün hazırlıq işləri başa çatdıqdan sonra növbəti vacib addım tədbirin hədəf auditoriyasına effektiv şəkildə çatdırılmasıdır. Tədbirin uğurlu keçməsi üçün düzgün tanıtım strategiyası qurmaq vacib rol oynayır. Bu məqsədlə markalar outdoor reklamlar (bannerlər, bilbordlar), sosial media paylaşımları, e-mail marketing kimi alətlərdən istifadə edərək tədbirlə bağlı məlumatları geniş auditoriyaya çatdırırlar. Bu üsullar sayəsində tədbirə maraq artır, iştirak səviyyəsi yüksəlir və hədəf auditoriya ilə birbaşa əlaqə qurmaq mümkün olur.

Tədbirin həyata keçirilməsi

Event marketing prosesinin son mərhələsi tədbirin həyata keçirilməsidir və bu, bütün hazırlıqların gerçəyə çevrildiyi nöqtədir. Bu mərhələdə bütün detalların planlaşdırıldığı kimi işləməsi üçün komanda operativ və koordinasiyalı şəkildə fəaliyyət göstərməlidir. Tədbir zamanı qonaqların qarşılanması, texniki dəstək, səhnə quruluşu və interaktiv hissələrin düzgün idarə olunması vacibdir. Eyni zamanda iştirakçıların rahatlığı, brend ilə təmas nöqtələri və ümumi təcrübənin pozitiv olması markanın imicinə birbaşa təsir edir. Tədbirin uğurlu keçməsi üçün hər an nəzarətdə olmaq, yaranan situasiyalara çevik reaksiya vermək əsas şərtlərdən biridir.

Event marketing-in üstünlükləri 

Markaların event marketing etməsinin əsas səbəbləri arasında markanı tanıtmaq və satışları artırmaq var. Amma bu tədbirlər təkcə tanıtımla məhdudlaşmır, onlar markalara bir çox fayda da qazandırır. Buna görə də event marketing hər bir marka üçün önəmli strategiyadır. İndi bu strategiyanın hansı üstünlüklər yaratdığına nəzər salaq:

• Yeni trendlərə uyğunlaşmaq asanlaşır. Tədbirlər markanı daha müasir göstərir.
• İnsanlar tədbirdə gördüklərini dostlarına danışdığı üçün marka haqqında məlumat ağızdan-ağıza yayılır (Word of Mouth Marketing).
• Daha çox insana çatmaq imkanı yaranır.
• Fərqli markalar və tanınmış şəxslər tədbirə dəvət olunduqda, daha geniş kütləyə çıxmaq olur.
• Dəvət etdiyiniz qonaqların sosial mediada paylaşdığı görüntülər markanızı daha çox tanıdır.
• Məşhur simaları tədbirə dəvət etsəniz, markanızın imici güclənir.
• Media nümayəndələri tədbirdə iştirak edərsə, markanızın tanıtımı tez və effektiv şəkildə yayılır.
• Bu strategiya markanızın reklamını təbii və təsirli şəkildə etməyə imkan verir.
• Tədbirdə insanlara məhsul və ya xidmətinizi yerində sınaqdan keçirmə imkanı yaradaraq etibar qazanırsınız.
• İştirakçılarla yaxın ünsiyyət quraraq markanıza bağlılıq yaradırsınız.
• Tədbir sayəsində markanız daha prestijli və diqqətçəkici görünür.
• Rəqiblərdən bir addım öndə olmaq və bazarda seçilmək daha asan olur.
• Nəhayət, event marketing satışlarınızı daha sürətli artırmağa kömək edir.

Event marketing-in çatışmazlıqları

Event marketing hər nə qədər markalara üstünlüklər qazandırsa da, bəzən bəzi çatışmazlıqları da var. Bunlara aşağıdakıları nümunə göstərə bilərik.

• Event marketing fəaliyyəti həyata keçirmək istəyən markalar yaxşı bir büdcə ayırmalıdır.
• Event marketing çalışmaları ciddi bir layihə və hazırlıq prosesi tələb etdiyi üçün tədbiri keçirməzdən əvvəl onun üzərində ətraflı işləmək vacibdir.
• Event marketing zamanı hər şey həmişə plan üzrə getməyə bilər. Buna görə də strateji yanaşma olmadan edilən səhvlər marka üçün mənfi nəticələr doğura bilər.
• Hazırladığınız event marketing strategiyası bəzi hallarda hədəf auditoriyanın marağını cəlb etməyə bilər.

Bu cür çətinliklər event marketing prosesində markaların qarşılaşa biləcəyi vəziyyətlərdir. Lakin düzgün planlaşdırma və peşəkar təşkilatçılıq ilə bu problemlərin qarşısını almaq mümkündür.